Búinn að tapa mér aftur

Í dag byrjaði ég að horfa aftur á LOST eftir margra mánaða hlé. Mér tókst að klára seríu númer tvö þrátt fyrir að missa áhuga á söguþræðinum allt of oft. Reyndar endaði sú sería ansi spennandi og ég ætlaði alltaf að fylgjast með þriðju seríunni, en svo gerði ég það einfaldlega ekki.

Þetta á reyndar við um margar aðra sjónvarpsþáttaraðir sem mér finnst skemmtilegar. Ég hef skyndilega og ástæðulaust hætt að horfa á t.d. Desperate Housewives, Heroes, Ugly Betty og, það sem mér finnst sorglegast, Veronicu Mars. Hins vegar sá ég þriðju seríu af VM á útsölu í dag á 20 dollara svo ég varð að kaupa hana, sem þýðir að ég mun leggjast í hana bráðlega.

En fyrst um sinn ætla ég að horfa á LOST.

Ég man þegar ég byrjaði að horfa á LOST. Kláraði fyrstu seríuna á þremur dögum; gat einfaldlega ekki hætt að horfa. Fannst eins og ég væri að lesa skemmtilega skáldsögu sem tók sér góðan tíma í að kynna persónur, skapa ógnandi og dularfullt andrúmsloft o.s.frv. Svo missti þetta allt saman dampinn í dágóðan tíma. Þriðja sería byrjar a.m.k. vel. "Pre-credit" sekvensið fjallar meira að segja um ást einnar persónunnar á Stephen King, sem gladdi óneitanlega mitt auðgladda hjarta. Ég held að persónurnar hafi verið að tala um The Langoliers("Furðuflug"), sem var reyndar aldrei gefin út í harðkápu í USAinu, svo ég gæti haft rangt fyrir mér, en í sjónvarpsþætti sem fjallar um strandaglópa eftir flugslys er erfitt að ímynda sér hvaða önnur King saga á betur við.

Ég veit að King var að fíla LOST í tætlur og að JJ Abrams fílar King í tætlur. Ætli uppáhaldsrithöfundurinn minn hafi pullað X-Files og laumuskrifað einn LOST þátt? Ég vona það innilega, en verð að efast. Það væri líklegast búið að blása slíkt upp umtalsvert. Annars var ég líka að fá mér nýjustu bókina hans King - Duma Key - og hún virðist mjög skemmtileg! Hlakka til að lesa hana í nýja stólnum mínum :D (lofa myndum síðar ...)

Svo er ég búinn að sjá fullt af nýjum og gömlum áhugaverðum myndum upp á síðkastið:

Cloverfield - Þetta er svona fyrsta "event"-mynd ársins hérna úti. Einmitt gerð af fólkinu sem er ábyrgt fyrir LOST. Hún er ágæt. Ef þið hafið einhvern áhuga á því að sjá hana, þá mæli ég eindregið með því að þið gerið það í bíói. Helst með fullt af fólki. Ég get ekki ímyndað mér að þessi mynd virki á sjónvarpsskjá. Margt gott í henni, en álíka margt slæmt. Eins og t.d. enginn klímax.

Juno - Æði. Sæt. Skemmtileg. Whatever. Þetta verður pottþétt "mynd" "ársins" skv. "gagnrýnendum". Og hún á það alveg skilið.

Sweeney Todd- Ég var einu sinni GEÐVEIKUR Tim Burton aðdáandi. Svo varð hann allt í einu eitthvað goth-fyrirbæri, en ég fílaði hann samt. Svo gerði hann Planet of the Apes. Ég fílaði hann samt. Svo kom Big Fish. Ég fílaði ennþá. Svo kom Charlie and the Chocolate Factory. Fílingurinn dvínaði talsvert. Svo kom The Corpse Bride og fílingurinn dó. Ég man ekki einu sinni um hvað sú mynd snerist, en það var eitthvað afskaplega ómerkilegt.

Ég var semsagt eiginlega búinn að afskrifa hann og allt sem ég hafði séð/heyrt um Sweeney Todd gerði ekkert til að breyta því áliti. Ég fór því á myndina með engar væntingar, sem var kannski eins gott því mér fannst hún yndisleg. Svo yndisleg að ég fór að sjá hana aftur fannst hún jafnvel ennþá betri þá!

Útlit myndarinnar er eins yfirgengilega Burtonískt og hægt er að ímynda sér, og ég get vel trúað því að það eitt eigi eftir að hrinda fólki frá henni, en að mínu mati er Sweeney Todd einmitt fyrirbæri sem þurfti á þessu sérstaka útliti að halda. Tónlistin, söguþráðurinn, "boðskapurinn" - allt saman passar þetta við Burtoníska útlitið.

Og talandi um tónlistina. Amazing! Og talandi um Amazing. Angela Lansbury lék í þessu verki þegar það var fyrst sett upp á Broadway. Og talandi um Angelu Lansbury. Þá er hægt að kaupa upptöku á leikritinu á DVD með Frk. Murder, She Wrote!

AMAZING!

Asylum - Amicus mynd sem er ekki annað hægt en að elska. Peter Cushing, Herbert Lom, Britt Ekland, Charlotte Rampling og fleiri í Z-hrollvekju antólógíu: Geðlæknir sækir um stöðu á gömlu hæli en kemst að því að fyrrverandi forstöðumaðurinn er sjálfur orðinn brjálaður. Ef hann getur fundið út hver sjúklinganna er forstöðumaðurinn brjálaði, þá fær hann starfið.

Yndislegt.

Antibodies - Þýsk mynd sem er einstaklega ógeðfelld og óþægileg en mjög vel heppnuð. Frábærlega vel tekin upp. Mjög vel leikin. Mjög áhrifarík. Maður gleymir henni ekki í bráð. En hverjum datt í hug að setja inn tölvuteiknuð dádýr á versta mögulega stað í myndinni? Omg, hálfviti!

Kominn til Minneapolis!

Jæja, þá er ég kominn aftur "heim" til Minneapolis eftir yndislega dvöl í New York hjá Baldvintátu. Ferðalagið heim var ekki áfallalaust; ég er svo gáfaður að ég vaknaði í gær klukkan korter í 6 um morguninn og tók leigubíl í flugið mitt, sem ég hélt að ætti að fara 9.35AM. Þegar ég var búinn að vera á flugvellinum í smá stund, sá ég að það var ekkert flug til Minneapolis á þessum tíma, svo ég leit aftur á miðann minn og sá ég átti í raun og veru að fara 9.35PM - þ.e. eftir 12 klukkutíma.

Til þess að gera morguninn yndislegri, þá áttaði ég mig skömmu síðar á því að ég hafði óvart borgað leigubílstjóranum 20 dollurum meira en ég átti að gera og var því staurblankur (enda greinilega samantekin ráð hjá Nemendaskrá HÍ og LÍN að leggja ekki inn á mig námslánin, þó svo einkunnirnar mínar séu komnar inn á Ugluna fyrir LÖNGU síðan!!) Ég fékk því smá panic-attack; staddur á flugvellinum með engan pening og síma sem var liggur-við inneignarlaus. Ég sendi því sms í von um að það kæmist til móður minnar góðu. Það komst á áfangastað og mamma reddaði peningamálunum snöggvast, svo mér tókst að taka subwayið aftur til Manhattan þar sem ég flatmagaði hjemme hos Baldvin næstu klukkutímana. Horft var á X-Files og drukkið var gin, eins og vera ber.

En að lokum komst ég loks á leiðarenda. Það hlýjaði mér um hjartaræturnar þegar flugvélin lenti og flugstjórinn tilkynnti farþegum að hitastigið í tvíburaborgunum væri ca. -1 gráða Fahrenheit (þ.e. -18 gráður celcius). Það var einstaklega sársaukafullt að anda þegar ég steig út úr vélinni. Góðir félagar mínir sóttu mig og það var mjög skemmtilegt að hitta þá. Helmingur þeirra skiptinema sem er eftir fer í næstu viku svo við verðum bara fjögur eftir, en það er góður hópur svo ég er bara hress með það.

Í morgun er ég svo búinn að endurraða helmingnum mínum í litla herberginu á heimavistinni, komplett með Pál Óskar í græjunum.. Núna er ég með koju og smá letipláss undir henni. Vantar bara baunapokastól eða eitthvað þvíumlíkt og þá verður þetta allt tilbúið.

Og svo er hann Heath Ledger bara dáinn! Smá sjokk og mjög sorglegt. Ég held að ég verði að horfa á Brokeback Mountain eða eitthvað til að minnast hans! :(

Já!!!

Girls Aloud eru tilnefndar sem besta hljómsveit ársins 2007 á Brit-verðlaununum!!! Núna er bara að vona að þær vinni, eins og þær vilja gjarnan sjálfar.

Þetta er líka skemmtileg lesning:

< Pitchfork gagnrýnir Girls Aloud / Sugababes, The Sound of Girls Aloud / Overloaded Rating: 8.5 / 8.5

Ég myndi líka setja link á fjögurra stjörnu gagnrýni Allmusic.com en síðan virðist liggja niðri í augnablikinu. Alas.

Það hefur kannski ekki farið framhjá neinum ...

... en Goldfrapp (a.k.a. Uppáhaldshljómsveit Erlings ársins 2006, a.k.a. Það Eina Sem Erlingur Hlustaði Á Árið 2006, Og Stóran Hluta 2007 Líka) ætlar að gefa út nýja plötu í lok febrúar.

Svona lítur plötuumslagið út:



Gordjöss, yes?

Og talandi um fegurð, þá mæli ég með því að fólk horfi á fyrsta vídjóið af þessari nýju plötu, við lagið A&E. Ótrúlega flott myndband, eins og var við að búast, og skemmtilega "öðruvísi" lag. Sem er samt ekkert svo öðruvísi ef maður hefur heyrt acoustic útgáfuna af Fly Me Away. Eða ef maður leggur saman hljóðið af fyrstu plötunni og popp-músík templatin af þeim seinni tveimur. Þá fær maður út A&E. Þetta er bara lógískt framhald. Frábært lag!

Þetta er þó ekki eina flotta myndbandið sem hefur komið út á þessum fáu dögum sem liðnir eru af árinu 2008. Nei, góðvinkonur mínar í Sugababes ákváðu að birta nýja myndbandið sitt við lagið Denial á heimasíðunni sinni. Og þó svo ég viti að margir fíla ekki the 'babes eins mikið og ég, þá er ekki hægt að neita því að þetta myndband er einfaldlega stórfenglegt! Ég held að þessi tvö myndbönd, Denial og A&E, verði kandídatar fyrir bestu myndbönd ársins 2008 í lok ársins, og ég bíð spenntur eftir að sjá fleiri!



En hvað með bestu myndbönd ársins 2007?

Já, ég er ekki alveg búinn með listana mína fyrir síðasta ár, en myndbandalistinn verður ekki birtur fyrr en eftir að ég er kominn aftur til Am'ríku þar sem harði diskurinn minn góði er, því mig langar að taka smá screencaps og solls ...

En hér er ein vísbending um myndband sem verður mjög ofarlega á þeim lista ... Hafiði séð þetta?



Annars hef ég verið að liggja mikið í leti síðustu daga, sem þýðir að ég er búinn að liggja á MySpace óeðlilega mikið, og einhvern veginn hef ég komist inn á spam-póstlista eða farið inn á spam-prófíl eða eitthvað, og núna er ég farinn að fá ca. 100 friend-requests á hverjum degi frá fögrum, lítið klæddum ungum konum sem heita klámmyndanöfnum. Þetta er ofsalega pirrandi.

Straight A student!

Húrra fyrir mér!

Þetta kallar á einn bjór, ef ekki tvo, í kvöld.